[香港]禽流雞走勻全港中央屠宰大隻講

由 Webmaster 周五 6月 13, 2008 9:49 am

【東方日報專訊】食物及衞生局局長周一嶽(相關)出名後知後覺，唔係功夫茶夾硬屈o架，睇吓近排禽流感回歸，佢上星期六出嚟話發現保安道街市雞檔爆發禽流感，但當時佢好似未瞓醒，話由於科學鑑證認為禽流感冇擴散迹象，唔肯果斷咁全港殺雞。

呢個周一鑊一話冇事嘅時候，大家就知呢鑊一定好大劑。話口未完，漁護署前日死死氣咁出嚟公布，上周六喺全港零售點、長沙灣家禽批發市場及雞場抽取逾三百三十個樣本，發現粉嶺聯和墟、屯門仁愛及香港仔鴨脷洲三個街市雞檔有樣本對Ｈ５Ｎ１病毒測試呈陽性反應，而保安道街市就再多一個帶病毒樣本，原來禽流雞早已走勻晒港九新界喇。

隔咗咁多日，直到街市只剩低幾千隻活雞，周一鑊至做吓啲門面工夫，賊過興兵搞個殺雞行動出嚟。大佬呀，十萬隻雞都流晒入市面，當中有幾多染病雞出咗去都唔知，市民都食晒落肚啦，一個唔好彩可能已經領咗嘢！

其實港大微生物學系主任袁國勇早就已經建議要全港街市休市，否則好難杜絕病毒，但周一鑊懶叻咁，當人哋教授嘅說話係耳邊風，跟番九七年嗰次一樣咁處理，邊檔有事就冚邊檔，真係離晒大譜！

周一鑊依家至話會考慮澳門及內地做法，將每日街市賣剩嘅活雞宰殺晒做冰鮮雞，冇活雞喺街市過夜，就唔會令到新雞同舊雞有接觸咁講。嘥氣啦，其實咪又係治標唔治本嘅措施！

自從九七年香港證實全球第一宗人類感染禽流感病例後，防疫專家、世界衞生組織亦指出，中央屠宰可以將人類同家禽有效隔離，減低感染病毒嘅機會。而呢十年來，各界都強烈要求當局落實中央屠宰，可惜街市賣活雞嘅問題至今都解決唔到，次次有禽流感就會拎個中央屠宰議題出嚟，但之後又係不了了之。

周一鑊仲度咗條屎橋，話研究係咪要將活雞先轉去深圳實施中央屠宰。真係多謝夾盛惠啦，周一鑊你連香港街市嘅衞生情況都未搞得掂，仲想跨境控制埋一向衞生麻麻嘅內地屠場？自己照吓鏡啦！今次驗出禽流感病毒遍布港九新界嘅街市，反映根本唔係零星個案，好明顯係街市嘅監察及防疫機制徹底失敗。

到咗呢個時候，好可能已經錯過咗防疫嘅最佳良機，周一鑊仲將事件歸咎有人走私未經檢疫嘅雞隻，又將防範禽流感不力嘅責任，快快手咁推晒落雞販身上，話係因為雞販冇呈報死病雞及舉報走私雞嘅結果。

吓吓都要雞販自動呈報，仲使鬼周一鑊做局長咩？今日就話屈業界啫，如果大吉利是有市民中招，呢位Ａ字膊局長，肯定又賴市民：咁多嘢唔食點解係都要食雞？明屈市民自己攞嚟衰囉！

醫療融資第一階段公眾諮詢今日結束，周一鑊拍心口話市民購買醫療保險，係有助佢哋獲得有質素嘅醫療服務，唔好單從錢嘅角度出發。其實計功夫茶話齋，小市民最大嘅考慮，並唔係錢呀，係怕香港仲有一個咁無能嘅周一鑊局長靠害呀！